طولك يالأكبر غاب .. ظليت بظلمة
برد قلبي اللهاب .. يوليدي بچلمة
مذبوح گبالي .. يوليدي الغالي
...
يالأكبر روحي و مهجتي .. هالكدر ذاب ابچلمتي
اصبحت علة الحزن .. و چنت انت علة بسمتي
تسمع ونيني و آهتي .. لمصاب فلذة جبدتي
تمزق الغالي بالحرب .. و هيج مصابي و لوعتي
تذكر ذيج لأيام .. لسنين الحلوة
صبحت مثل الأحلام .. ولحاضر بلوة
تصوب دلالي .. يوليدي الغالي
...
حط راسك يبني فيالحجر .. و شرب من دمعي لينحدر
خلني اشم ابمنحرك .. ريحه جدي و فوح العطر
انظر ابوجهك حيدره .. و جدتك الزهرة الطهر
موتك جدد فباطني .. طبرة علي و يوم الكسر
هذا ضلع البتول ..الجارح فادي
هذا حيدر مقتول .. لو هذا الهادي
جاوب سؤالي .. يوليدي الغالي
...
بعدك على الدنية العفه .. وجه الأرض مظلم صفه
مو گمر طايح عالترب .. طايح كتاب المصطفى
دمك القاني لينحدر .. توراة موسى النازفة
ترٌوح معنى العيش ساعت .. لنفسك يوليدي اختفه
أرد اتوسد يمك .. وون بحسرة
و بالنوحه اكلمك ... و انته عل غبرة
ظليت الحالي .. يوليدي الغالي
...
يوليدي أمك فالخيم .. ولعين غافت بالألم
شي صير بيها يا علي .. لون تدري العمر نختم
بيها شلون لون شافتك .. و جسمك مغسول بفيض الدم
و كثرة لجروح بجثتك .. ولاشبر منك سلم
تدري بگليب الأم .. عل الأبن ساهر
يتجرع كاس السم .. لمن يهاجر
ولدمع هالي .. يوليدي الغالي
...
مشتاگ اسمع من شِفٌِتَك.. لحروف التبرز بسمتك
و عاين طولك يالچبد.. و سمع لدگة مشيتك
ويلاه يبني يا علي .. گرب موتي من فرگتك
صوبت برماح الأجل .. نظرة اعيوني لجثتك
هذا لموقف چتال.. منحني ظهري
تشمت بيٌه العذال .. ولدمع يجري
گربت آجالي.. يوليدي الغالي
...
ياوسفه جسمك عالرمل .. و من دمك لحمر ينغسل
خلني احملك يا علي .. وساعدني يبني بالحمل
عوف النوم و گوم بعجل .. و عاين لجسمي المنتحل
چنت اريدك ابموتتي .. تراب اللحد فوگي تهل
مشهورة بين الناس .. الميت عده
عياله لترفع الراس .. و تشيعة للحده
معكوسة احوالي .. يوليدي الغالي
